|
●
Return to list of articles
Essie, Black Diamond, Bon Chance
Limousins
____________________________________________________
Sowat 15 kilometer buite Bothaville, Vrystaat, langs ‘n
sinkplaat-grondpad is Hartebeesbult geleë. Dit is op hierdie
plaas waar jy ‘n lang man met ‘n khaki uitrusting, rooi keps
en ‘n donker baard, tussen sy beeste sou vind. Hartebeesbult
is en was die tuiste van Coen Steenkamp, sy familie en die
swart en wit Jack Russel, Leeu.
Dit is ook híér
waar Essie Limousins in 1987 ontstaan het, en na 38 jaar
word 3 kuddes; naamlik Essie, Black Diamond en Bon Chance
Limousins, suksesvol hier bestuur.
Theo Kruger,
president van die stigtersraad van Limousin Suid Afrika en
later ook die president van die genootskap (1986 tot 1992),
sowel as ‘n beoordeelaar.
Theo was een van die invoerders
wat in 1975 vroulike diere vanaf
Frankryk ingevoer het, en so het Bon Chance Limousins
sy ontstaan in Oktober
1975 gehad met die invoer van 8 ongedekte verse. Semen van
die toe bekende KI bulle
Favori, Flavus en Filou is gebruik.
Die verse wat
die grootste invloed op die kudde gehad het was afkomstig
uit die kuddes van
Monsieur Chastanet (S Lyn), Monsieur Blancher (G Lyn),
Monsieur Buxeraux (F
Lyn) en Monsieur Peyjou (A Lyn). Die bul Bon Chance Aggenee
(Filo seun en kleinseun van die bekende Dahlia) het ook ‘n
groot invloed in die opbou van die kudde gehad, onder andere
die vaar van Bon Chance Genoeg 80 en Bon Chance Fameuse 81 –
moeder van die Francilla familie.
Bon Chance
Genoeg 80 is in verskeie kuddes as kuddevaar gebruik en daar
is tot vandag van sy bloedlyne in Essie, Black Diamond en
Bon Chance Limousins.
In 1985 is 4
dragtige verse ingevoer, afkomstig uit die kuddes van
Monsieur Louis de Neuville, Monsieur Ronald Marceilloux en
Monsieur Beyrand en die bekende bul Valromey (Monsieur J M
Bontet). Hieruit is die P- R- en U koeilyne ontwikkel,
gevolg in 1987 deur die gesogte koeilyn in Frankryk –
Alouette (O-lyn) ‘n halfsuster van Cachou.
Valromey is as
kuddevaar verantwoordelik vir ‘n nageslag bestaande uit
goeie kuddevaars en
verskeie skou-wenners. Die bekendstes is Bon Chance Valmy en
Bon Chance Vosca
(gebruik in die Essie kudde).
Deur Coen en
Theo se vriendskap, het Coen van Limousins kennis geneem en
het hy dadelik van die diere se bouvorm, geaardheid en goeie
temperament gehou. Die klein kalfies by kalwing het ‘n groot
invloed op sy keuse gehad. Essie Limousins is in 1987 gestig
met een dragtige vers uit Frankryk en een koei wat vanaf die
Bon Chance kudde aangekoop is. In 1988, na ‘n vinnige draai
in Frankryk met Theo, is nog 8 verse (4 dragtig en 4
speenverse) ingevoer vanuit die kuddes van Monsieur Louis de
Neuville, Jamot, Toulisse en Boutet. Bon Chance Vosca en
Wanita Theodore (kuddevaar 1988 – 1993) is gebruik in die
opbou van die kudde.
Bon Chance
Vosca (kuddevaar 1990 – 1997) was in 1989 die kampioen bul
op Bloemfontein
skou en in 1990 is hy op die Randse skou as kampioen bul
gekroon.
In Februarie
1991 het Coen en Theo saam die bekende bul Etna (seun van
Bicot – Franse kampioen 1990 – kleinseun van Prince)
ingevoer. Etna was in
1992 as die ras kampioen bul op Pretoria skou aangewys en in
1993 as die senior,
groot en ras kampioen bul op Bloemfontein skou gekroon. Etna
het ‘n merkwaardige nageslag geteel waarvan Essie SPO0017
(ma van La Rhone Escape, Essie Etma, Essie Eton, Essie Etbo
en Bon Chance Etsa ‘n paar van die diere is.
Op Woensdag, 26
Oktober 1994 het Coen ‘n algehele uitverkoping van alle
vroulike diere in die
Essie kudde bo die ouderdom van 3 jaar, gehou. Van die
vroulike diere wat op hierdie veiling verkoop is, was onder
andere Anisette, Darling, Donzelle, Becasse, Belote,
Bambelle en Dinette; almal afkomstig van Frankryk.
In 1995 voer
Coen, Theo en Dr. Swart 3 nuwe bulle genaamd Juju, Jacobus
en Junior in vanaf Frankryk.
In 1998 het
Coen gekwalifiseer as Limousin ras beoordeelaar.
Coen het ook
verskeie koeie van Warrie Cilliers van Wanita Limousins
gekoop, van die koeie was onder andere Wanita Charlene, die
moeder van die Charlene familie en Wanita Valentine, die
moeder van die Valente familie.
Bets (Coen se
vrou) het 10 swart Angus koeie by haar oom geerf en so het
Coen die Limousin bul,
genaamd Black Powder, op daardie koeie gebruik en die nasate
van die diere is
toe aanhangsels gemaak en hy het die kudde as Black Powder
Limousins geregistreer. Later, toe die swart diere meer rooi
geword het, het Coen semen ingevoer en in 1999 is
Black Diamond Limousins by die konsortium in Harrismith
gekoop.
Hiervan is die
Black Diamond Limousin stoet wat vir ‘n tyd die enigste
swart Limousin-stoet in Suid-Afrika was.
In November
2003 sluit Erpe Jansen van Vuuren by Essie en Black Diamond
Limousins aan, en hy word later die bestuurder en ook die
“gesig” van die twee kuddes.
In 2007 word
Essie Vobess – ‘n dogter uit die Donbess familie – op
Vryburg skou gekroon as
Suid-Afrika se groot kampioen koei, asook kampioen tydens
die interras. In daardie jaar was daar 1 200 beeste oor al
die rasse op Vryburg skou. Op Bloemfontein skou wen Vobess
ook die interras.
In 2012 word
die koei Floris Elma – uit die Alouette familie – by die
bekende Floris
Limousins
gekoop, sy was dragtig van La Rhone Escape – ‘n Etna
kleinseun – en op 4 Oktober 2012 is Essie Escama gebore. Wat
‘n besonderse bul was hy nie! Escama is vanaf 2017 in die
kuddes gebruik en in 2020 word hy as kuddevaar oor die 3
kuddes gebruik. Escama het die hele kudde se tipe verander
deur meer sagter bespiering en goeie diepte in die nageslag
by te voeg.
Verskeie bulle
– genaamd Donor, Haka, Qwela en Monk - van Hennie Viljoen
van die Renlo
Limousin- stoet, word later in die kuddes gebruik. Hierdie
bulle het ‘n goeie vroulike lyn geteel.
Op 1 Januarie
2017 koop Erpe Bon Chance Limousins by Theo Kruger, die
kudde is steeds in sy
besit.
Tydens die 2019
Nasionale Kampioenskappe, waartydens Essie Classic 5-7 as Intermediêre
kampioen vers gekroon was, het Essie, Black Diamond en Bon
Chance Limousins uitstekend gevaar.
Invoer-genetika
is die hoeksteen van Essie, Black Diamond en Bon Chance
Limousins.
Essie Limousins
bestaan uit verskeie sterk koei families; soos Charlene,
Valente, Hotplate, Wine,
Classic en Chance. Black Diamond Limousins huisves bekende
families; soos Cadet, Denim, Vision en Shani. Bon Chance
Limousins bevat verskeie goeie koei bloedlyne; soos die
Riego, Ronel, Anet en Carla families.
Na meer as 35
jaar kan ons met trots terugkyk na ‘n geskiedenis gevul met
genade, liefde, visie en passie en ons dank ons Hemelse
Vader vir soveel seëninge.
Essie, Black
Diamond en Bon Chance Limousins; ‘n geskiedenis soos min. |
